Lawngtlai 2^nd May, 2022: Ministry of Health and Family Welfare, Govt of India-in India Independence kum 75-na lawmna, "Azadi ka Amrit Mahotsav" puala April ni 18 - 29, 2022 inkar chhunga India ram chhung block tina health mela (hriselna kutpui) buatsaih tura a ruahman angin, 18-29 April khan National Health Mission (NHM), Health & Family Welfare Department huaihawtin Lawngtlai Block tan Govt Region Higher Secondary School, Lawngtlaiah block level health mela buatsaih a ni.

Lawngtlai Block tana health mela buatsaih hawnna hun GRHSS tuala zing dar 9:30-a buatsaih chu Lawngtlai East Bialtu MLA, Agriculture Development Board Vice Chairman Pu H. Biakzaua chuan hmanpuiin, hlawhtling taka block level health mela buatsaih a nih theih nana hma latu District Level Committee chungah lawm thu a sawi a. Block tina health mela buatsaih tur chu Lawngtlai District tan thil lawmawm tak nia a hriat thu leh mipui pawhin an hlut hle dawna a lan thu sawiin, block danga buatsaih leh turah pawh mipui tam zawkin an chhawr theih nan darh zau zawka puanzar a pawimawh tih a sawi a. COVID-19 hri lengin harsatna leh tuarna nasa tak a rawn thlen leh nunna hlu tak tak kan chan chu a lungchhiatthlak hle rualin, mipui inralrinna leh hriselna kawnga inbuatsaihna leh hmasawnna a rawn thlen chu a phena malsawmna nia a hriat thu a sawi. Mipuite’n inentir chu kan peih a, damdawi ei kawngah leh zuk leh hmuam leh ei leh ina insum kawngah kan inthlahdah ṭhin chu thil pawi tak a ni tiin, health mela chhimtute chu doctor-te thurawn pawm thiam turin a chah a. Sawrkarin mipui hmakhaw ngai taka health care scheme a kalpui chu a hlutna hria a, inziak lut tur leh chhawr ṭangkai tum turin mipui kal khawmte chu a chah a ni.

Health mela hawnna inkhawm hi Lawngtlai Bawrhsap Dr Andrew H. Vanlaldika'n kaihruaiin, kal khawmte lawmna thu a sawi a. Senior Medical Officer Dr S. Thaizi chuan report pein, Chief Medical Officer Dr LP Malsawma'n lawm thu a sawi a. Ayushman Bharat Digital Mission hnuaia India khua leh tui tinin hriselna kaihhnawih ID hran (Unique Health ID) an neih tur atana bul ṭan nan Khuallian Pu H. Biakzaua leh Bawrhsap Dr Andrew H. Vanlaldika te chu Ayushman Bharat Health Account (ABHA) hawnsak nghal an ni.

Lawngtlai Block tana health mela buatsaihah hian stall 10 leh clinic 8 hawn niin, inziah luhna leh OPD hawn a ni bawk a. Stall hrang hrangah hian inkai chhawn theih loh natna (non-communicable disease) lam te, zuk leh hmuam kaihhnawih (tobacco) lam te, rilru hriselna (mental health) lam te, HIV/AIDS kaihhnawih (MSACS) lam te, hri danna pekna (vaccination) hmun leh NHM hnuaia prog hrang hrang inphona hmun te buatsaih niin, Ayushman Bharat Digital Mission hnuaia India khua leh tui tinin hriselna kaihhnawih ID hran (Unique Health ID) an neih tur atana lo inziah lawk theihna te, AB-PMJAY Golden Card siamna hmun te buatsaih a ni a. Specialist leh doctor thiam tak takte chu mipui rawn theih turin clinic hawngin an ṭhu bawk a ni.

Block level health mela hi April ni 21 (Ningani)-ah Chawngte Block tan Chawngte-ah buatsaih leh ani a. Hetah hian clinic 6 leh Stall 12 hawn niin, doctor thiam tak takte clinic-ah hian an thu bawk.

April ni 22 (Zirtawpni)-ah Bungtlang 'S' Block tan Bungtlang 'S'-ah Health Mela hi buatsiah ani leh a. Hetah hian Clinic 5 leh stall 11 hawn niin, doctor thiam tak takten an thutpui bawk.

April ni 26 (Thawhlehni)-ah Sangau Block tan Sangau-ah buatsaih leh ani a. Clinic 4 leh Stall 8 hawn ani. Dr. Lalrindika, Dr. Lalchamliana, Dr. Noel Lalremruata Sailo leh Dr. R. Malsawmtluanga-te Clinic ah hian an thu a, mipuiten an hlawkpui hle.